व्यथा

व्यथा

कुणी कुणासाठी जीव जाळला
ऐकल्यात मी कथा किती
मागितले दोन थेंब पाणी
सांगितल्या लोकांनी व्यथा किती  ।।

आयुष्यभराची व्यथा होती
त्याचे वाटले न दु:ख तसे
अपुले आपुले वाटणारे
झालेत अचानक रुक्ष कसे

असणे नसणे : मागणे देणे
तश्या फक्त अवस्था
तुझ्या वर न वेळ येवो
न ढळो आमुची आस्था

अरे देण्यात काही मजा असते
दिलेत का कधी कुणा
दिलेत कि कळेल
दिले कि घ्यावेसे वाटते पुन्हा

असो तुझे विचार मोठे
आचारात हि फरक पडो
पुन्हा मागणे हेच कि
तुझ्या वर मागण्याची वेळ न येवो ।।


- अमित जहागीरदार
  २४ ऑगस्ट २०१६

हक्क माझा

हक्क माझा

मी न वाकेन आता
जरी भार जगाचा माथ्यावरी
श्वास घेईन तमाचे
स्वार होऊन प्रकाशावरी

न मला भीती
जगण्याची वा मरणाची
जिद्ध माझी न संपणारी
हातून चांगले घडण्याची

मी करेन तेच
मलाही ज्याचा गर्व व्हावा
हसू कुणाच्या ओठांवरती फुलावे
हाच माझा धर्म व्हावा

झिजत जावे सर्वांसाठी
गंध पसरावा भोवताली
मागणे नाही अजून काही
झुकतो तुझ्या पायी

दे तेवढे जे तू देऊ शकतो
मी न त्यातला जो रडत बसतो
याचकाचे ढोंग नाही
हक्क माझा मागून घेतो

अमित जहागीरदार
२०१३

फुलून येते मी अशी

फुलून येते मी अशी

स्पर्श होताच तुझा फुलून येते मी अशी
शब्द सुचतात कसे? आणि गाते मी अशी ।।

नसतोच पक्षी गगनात
तूच भिरभरतो मनात
येतोस जसा जवळी आणिक भिजते मी अशी ।।

वाटते मजपाशी खूप आहे
मनात अजुनी तुझी ओढ आहे
दिव्याची वात जशी जळते मी अशी ।।

जगण्याचा तूच मोह
आनंदाचे चहूकडे डोह
पंख लावून सुखाचे उडते मी अशी ।।


अमित जहागीरदार
२०१५

बंध

बंध

कळलेच ना काय काळजात चालले
कोणती हि कंपने काय मनात धावले ।।

कोणती हुरहूर घेऊनी
दिवस आला उगवूनी

आरश्यात आज का रूप माझे सजवले  ?

गंध नवा माझ्यात
श्वास भिनलंय श्वासात
वाटते मज नवे आकाश आज गवसले ।।


तू येणार तू बघणार
तूच तू अन मीच मी उरणार
तू होणार मी मग मागे काय उरले ?


देह  माझा तुझ्याच साठी
श्वास घेते तुझ्याच साठी
बंध जन्माचे अपुले साक्षीला हात हातातले !

- अमित जहागीरदार

५ जुलै २०१०

थांब ना सख्या!

थांब ना सख्या! रात्र उश्याशी हरवून जाईन
हे भास नवनवे मी तूझ्यात मिसळून जाईन ||

कधी माझे कधी तुझे
नवे जुने तेच बहाणे
सोस चंद्राची किरणे पहाट मग थांबून  जाईन ||

स्पर्श तोच ना असतो तुझा
नवा‌ कसा मग भासतो मला
अंगावरी तुझ्या स्पर्शाची नक्षी रंगून जाईन ||

हे न‌ असे घडणार पुन्हा
न ऐकले न दिसले कुणा
गंध अपुल्या मीलनचे गुपीत सांगून जाईन ||

भासतोस माझेच एक रूप तू
तहान तू माझी अन् ‌भूक तू
एक होवू असे श्वास श्वासांत गुंतून  जाईन ||

-अमित जहागीरदार
१५ मार्च २०१८
पूणे

आई आज तू असायला हवी होतीस

आई आज तू असायला हवी होतीस 


आई आज तू असायला हवी होतीस
तुझा - तुझ्याविना चाललेला संसार
दुरून बघायला
तू आज असायला हवी होतीस ।।

बाबाला ब्रेड वरती जॅम देखील नीट लावता येत नाही
घाई झाली कि पायात मोजे देखील घालता येत नाहीत
माझ्यासोबत पोट धरून हसायला
तू आज असायला हवी होतीस ।।

मी माझी सकाळी वेणी घालून शाळेला जाते
बाबाने घालून दिलेली वेणी काही तासच टिकते
माझ्या विस्कटलेल्या वेणीवरचे jokes ऐकायला
तू आज असायला हवी होतीस ।।

अभ्यास घेतांना माझ्यापेक्षा बाबाला झोप जास्त येते
office मधल्या तणावानंतर त्याची मागणी रास्त असते
झोपलेल्या बाबाला कुरवाळतांना बघायला
तू आज असायला हवी होतीस ।।

मी तशी शूर आहे ! घाबरवायला येतो रात्रीचा अंधार
तुझ्या मायेची उब आठवते अन मिळतो त्याचा आधार
पण कौतुकाची थाप पाठी द्यायला
तू आज असायला हवी होतीस ।।

एकटीच असते- शून्यात बघते ! जग म्हणत सगळ तेव्हा
माझ्या मनात तू आणि नातं आपुल, भासत वेगळं तेव्हा
माझं विश्व तू असं मिठीत घेऊन म्हणायला
तू आज असायला हवी होतीस ।।

पण आई हा असा विरह नसता तर
हे सगळे प्रश्न नसते
आयुष्य इतके क्लिष्ट नसते
मला तर नाही कळत असत किती वेगळं
पण त्याचा अनुभव द्यायला


तू आज असायला हवी होतीस ।।
आई तू आज असायला हवी होतीस ।।


अमित जहागीरदार
१३ मे २०१७
पुणे 

प्रेमात तुझ्या पडल्यापासून

प्रेमात तुझ्या पडल्यापासून

प्रेमात तुझ्या पडल्यापासून
कळल काय असत
आपल्या कुणाची वाट बघण
अन दिसताच तू
कळत चातकाला श्रावण मिळण ।।

प्रेमात तुझ्या पडल्यापासून
श्वासात मी गंध भरू लागलो
खुल्या भकास आकाशात
प्रीतीचे रंग  भरू लागलो ।।

प्रेमात तुझ्या पडल्यापासून
लांब वाटा लहान झाल्या
तुझ्या डोळ्यांच्या दोन ज्योती
जीव का प्राण झाल्या ।।

प्रेमात तुझ्या पडल्यापासून
चंद्र माझ्याशी रोज बोलतो
वेडेपणाच्या किस्स्यांवर तुझ्या
दिल खुलास हसतो ।।

प्रेमात तुझ्या पडल्यापासून
मनात लाखो तरंग उठतात
बागेतल्या फुलपाखरांचे जसे
हातावरती रंग सुटतात ।।

प्रेमात तुझ्या पडल्यापासून
आकाश अगदी इवलास वाटत
बहरलेल्या पारिजताका सारखं
हसावस वाटत  ।।

प्रेमात तुझ्या पडल्यापासून
कळायला लागलाय :
समुद्रात का लाटा उठतात
तुला भेटून जाताना
माझ्या का वाटा चुकतात ।।

प्रेमात तुझ्या पडल्यापासून
शुक्राची चांदणी मंद हसते
अन रोजची नीरस संध्याकाळ
मला आता धुंद भेटते  ।।

प्रेमात तुझ्या पडल्यापासून
मी सूर्यास्त रोज बघतो
अन  त्या नारंगी किरणात
मनसोक्त भिजतो ।।

प्रेमात तुझ्या पडल्यापासून
गार हवा अंगाला बोचू लागते
अन तुझ्या वर एक कविता
तू भेटली कि सुचू लागते

प्रेमात तुझ्या पडल्यापासून
मोर थुई थुई नाचू लागला
अन वारा शिळ घालत
तुझे गाणे गावू लागला ।।

प्रेमात तुझ्या पडल्यापासून
खांद्यावर माझ्या पाखर रुळतात
आणि बघून मला शेतातली
कणस डुलतात ।।

प्रेमात तुझ्या पडल्यापासून
कोकिळेची तान कळते
अन तुझ्या आठवणीच्या
चंद्राची रात्र जळते ।।

प्रेमात तुझ्या पडल्यापासून
कळल का असतो रंग निळा आकाशाचा
अन का क्षणात जातो
पाण्याबाहेर प्राण माश्याचा ।।

प्रेमात तुझ्या पडल्यापासून
रात्र माझ्याशी बोलायला येते
अन एक वेडी चांदणी
कुशीत माझ्या निजायला येते ।।

प्रेमात तुझ्या पडल्यापासून
काय असते मुक्ती कळली
अन प्रेमात असलेली भव्य दिव्य
शक्ती कळली ।।

प्रेमात तुझ्या पडल्यापासून
मी निशिगंधाचे फुल होतो
पडताच पाऊस
गंध पसरवणारी धूळ होतो ।।

प्रेमात तुझ्या पडल्यापासून
कळली मला गुलाबी थंडी
अन मोगऱ्याच्या कळ्यांची
कळली मदिर धुंदी ।।

प्रेमात तुझ्या पडल्यापासून
मी पाखरांचा रव होतो
पहाट प्रहरी जमणारे
पाकळीवरचे दव होतो ।।

प्रेमात तुझ्या पडल्यापासून
समजायला लागलाय नदीच वाहण
अन मिलनास आतुरलेल्या
सागराच्या कुशीत शिरणं ।।

प्रेमात तुझ्या पडल्यापासून
येतो तुझ्या वाचून जगण्याचा वीट
हवा हवासा वाटतो
तुझ्या हातांचा स्पर्श धीट ।।

प्रेमात तुझ्या पडल्यापासून
जीवन झालाय सार्थ
तू माझ्या प्रेमाचा सागर
मी तुझा तृषार्त ।।



अमित जहागीरदार
१४ फेब २००० ते २०१८