काय घेऊन आलो
काय घेऊन आलो
काय घेतले कवेत आहे
जगण्याचा छंद निराळा
काय इथल्या हवेत आहे
जुन्या हिशेबाच्या किती फाडल्या इथे वह्या
स्वतःला मी विसरलो किती बदलल्या तऱ्हा
काय सांगू विधात्याला
काय त्याचे गूढ बेत आहे
मागती इथे सगळे जन्म जन्मांची नाती
शेवटी असे तरी का मूठ त्यांची रिती
निवांत क्षण तोच आता
लाकडांची सेज आहे
अमित जहागीरदार
पुणे
१७ जून २०२५
हा पाऊस नवा होता
पाहिलेत किती मी जरी , हा पाऊस नवा होता
प्रत्येक थेंब सांगून गेला, तू जवळी हवा होता ।।
मोजलेच नाही मी, मोहून गेले किती वेळा
मी भिजले होऊन राधा, तू माझा सखा होता ।।
मी मजला कळू लागले, पावसाचे थेंब जसे
मी झाले आसंमत, तू माझा थवा होता ।।
मी बोलावले तुला, जवळी माझ्या
ती माझी स्पंदने, तुला वाटले पारवा होता ।।
येण्याने तुझ्या सुखाचे सूर गवसले
तिहाई गाठलेला तो दुःखाचा मारवा होता ।।
ये माझ्याकडे, विरघळून जा माझ्यात
नुसताच अपुल्यात अजूनही , धुंद गारवा होता ।।
अमित जहागीरदार
९ जून २०२०
(लॉक डाउन )
पाऊस हा निराळा होता
बरसत आला असा पाऊस हा निराळा होता
भिजलो चिंब तुझ्यात आठवणींचा उजाळा होता
कुठला थेंब शमवी वणवा मनातला
न समजण्या तू का इतका भोळा होता ?
तरंगती मनात स्वच्छंद ढग भावनांचे
तू निळ्या आभाळासम मोकळा होता !!
मला वेध अंगणी पारिजात बहरण्याचे
येण्याने तुझ्या नवा मोगरा फुलला होता
आलेत कितिदा वसंत फेर धरूनी
अंकुर मनातला तेवढाच कोवळा होता
अमित जहागीरदार
पुणे
१५ सप्टें २०२५
मज द्यावे कुणी आकाश आणुनी हाती
पंखांचे रंग फुलावे सूर जुळत जाती
मी अचेतन असतो
दूर तुझ्याविना
मनी विचार येई
झंकारती वीणा
चातकाची तहान थोडी चांद थिजतो आकाशी
या देहाचे देणे लावतो
कळते मग मी का जगतो
भास होती तुझेच सारे
गंधात तुझ्या वाहतो
व्यापले मन काळोखाने पेटती जिवाच्या लाख वाती
मज द्यावे कुणी आकाश आणुनी हाती
— अमित जहागीरदार
२ जाने २०२५
पुणे
अपूर्ण वर्तुळ
कोण? कुठला ? नाव काय ? कोणते कुळ ?
फिरतोय दिशा दाही पूर्ण करण्यास वर्तुळ ।।
मोजले कुठे कधी डोळ्यातले पाणी
कळली नाही काय व्यथा न कहाणी
हसणे ओठावर तर दुःख खोल अन गूढ ।।
भोगले ते भासे आकाश
आनंदाचा कुठे असे वास ?
हिशेब "तो" करे पण हाती असे आसूड ।।
उमेद जगण्याची शोधून थकलो आता
हात जोडले अन टेकवितो माथा
शांत कर वादळ हे ! शोध खरे मूळ
मातीचा म्हणे जपतो धर्म
मातीचं जाणे सारे कर्म
मातीत मिळण्या का जन्मलो ? काय जडले खूळ
फिरतोय दिशा दाही पूर्ण करण्यास वर्तुळ ।।
अमित जहागीरदार
१९ जानेवारी २०२३
