तू मला (अजूनही)

तू मला (अजूनही)

पहाटेच्या दवबिंदूंची शपथ
तू मला (अजूनही ) तितकीच आवडतेस
भाव कोणतेही असो मनात
तू मला (अजूनही) तितकीच भावतेस ।।

जागवून रात बोललो
किती दिवसांच्या कथा
कधी हसणारे क्षण आपुले
कधी आपुल्या व्यथा
त्या चांदण्या नभाची आण मला
तू मला (अजूनही) तितकीच वेडावतेस ।।

सांगायचे कधी तुला तर
न सांगणे तुला कधी
डोळ्यात पाहुनी कळतेच
ना काय माझ्या मनी
वेगळे नाहीच आपण माझे रूप दुसरे
तू मला (अजूनही) तितकीच भासतेस ।।

अमित जहागीरदार
२८ एप्रिल २०२०
( लॉक डाउन मधले पराक्रम )

नवी मी

नवी मी


असच राहू दे जे चाललंय !!
मी जमवते
तू फेकत जा
मी कमवते
तू लुटत जा

मी जोडते
तू तोडत जा
मी रचते
तू मोडत जा

मी रमते
तू बोचत जा
मी फुलते
तू खोचत जा

मी मोजते
तू चुकत जा
मी संपते
तू नवी मी
शोधत जा

अमित जहागीरदार
०३ फेब्रुवारी २०२०

काय सांगू ? किती सांगू ?

नाव तुझे तनूवर माझ्या
कुठे गोंदवू ?
काय गोंदवू ?
वेडावलेल्या मनाला
काय सांगू ?
किती सांगू ?

तू येशील कि नाही
वाद माझे माझ्याशी
रोज रोज स्वतःशी
किती भांडू ?
कधी भांडू ?

स्वप्न मी जे देखिले
फुल मणी जे उमलले
गंध त्याचे मनी माझ्या
कसे कोंडू ?
किती कोंडू ?

रंग संगती
छान जुळती
चित्र कोणते त्याचे
कसे मांडू ?
कुठे मांडू ?

- अमित जहागीरदार
  २८ जानेवारी २०२०
  पुणे 

बोन्साय

बोन्साय


जुनी पुराणी पत्रे तुझी
फाडताना हात दुखलेत
कागदांचा गर्द धूर झाला
शब्द मात्र मागे उरलेत ।।

हलक्याच हाताने
गुलाबी कागदावर
तू प्रत्येक शब्द लिहला होता
विश्वास ठेव
जाळताना मी हि अर्थ त्यातला
मनात कोरला होता ।।

आता ते कागद नसतील
पण मनाच्या कप्प्यात त्या भावना असतील
कधीच उघडायचा नाही तो कप्पा असं ठरेल
पण काही तासात ते बेत फसतील ।।

तू मात्र घाबरू नकोस
त्या आठवणींचं होईल काय
कितीही दिवस सरले तरी
असं किती वाढत रे बोन्साय ।।

- अमित जहागीरदार
    ४ ऑगस्ट २०१७

येऊनी तुझ्या चरणी

येऊनी तुझ्या चरणी 

तुलाच शोधिले
दिसताच पूजिले
होतास कुठे?
कितीदा पुसले ।।

वादळांच्या वेटोळ्यात
गर्दीच्या गलक्यात
अंतरीचे गीत माझ्या
तूच ना रे ऐकिले ।।

मी न असे नास्तिक
पण भावनांची भीक
घालून कुणास तू
काय आजवरी दिले ।।

हात घेऊन हाती
ने मज पैलतिरी
तिथे भेटेल प्रिती
आणि सत्य मनातले ।।

नामात तुझ्या वेडा मी
मार्गातला खोडा मी
होईल पुन्हा खरा मी
पुजता विठ्ठल्ले ।।

भार होता मनावरी
वाटे तो मोरपिसापरी
येऊनी तुझ्या चरणी
जग मी सारे जिंकले ।।

अमित जहागीरदार
२४ जून २०१९

हातावरल्या रेषा

हातावरल्या रेषा 

ये अशी स्वप्नात माझ्या तेवढीच भेट होते 

कधी हातांची कधी नजरेची वा थेट होते ।।

पाहिलेस माझ्याकडे रागाने तू कित्येकदा.. 

लाडिक नजरांनी तुझ्या मग समेट होते ।।

येत नाहीस तू अन मनात दाटते काजळी 

येऊन चिंब करणारी तू की नभात मेघ होते ?

आठवणीत तुझ्या फेसाळणारा सागर झालो 

चाललो इतके जरी काटे तुझ्या वाटेत होते ।।

धन्य झालो जेव्हा तुला पाहिले आम्ही 

प्रेम हे असले कुठे हातावरल्या रेषेत होते ।।

-अमित जहागीरदार 

  ६ डिसें २०१८

  पुणे 

राधा मी तुझी

राधा मी तुझी 

मी तुला पाहिले
अन होते ते वाहिले
मनावरी  कोरिले
नाव तुझे

ओढ भेटीची मनी
दिस संपे एक क्षणी
वाट तुझी पाहुनी
जीव जळतो

हुरहूर तुझी अशी
नटले मी कितीही जरी
चांदणे नेसले तनुवरी
वाटे कणभर

बाहुत बाहू जरी गुंतले 

अंतरआपुल्यातले संपले

मन अलगद तरंगले
भरले नाही

आठवणीसाठीच का भेट
विचारात तुज थेट
उत्तर तुझे नुसतेच
गोडं हास्य

येशील ना मना
सख्या सवंगड्या पुन्हा
होऊन माझा कान्हा
राधा मी तुझी

१६ जान २०१९
बंगळुरू