पावसाचा अनुभव नवा

पावसाचा अनुभव नवा

बाहेर उन्हाचा काहूर
मनात माझ्या पाऊस
न भिजण्याचं तुझे बहाणे
मला चिंब होण्याची हौस

पावसाला बघितले कित्येकदा
मी खिडकीत माझ्या
स्पर्श करून गेला तो कित्येकदा
मनाला निपचित माझ्या

पडण्यास म्हणे त्याला
ढगांची चादर पांघरावी लागते
मनातल्या पावसाला
कास मनाची धरावी लागते

विचार पावसाचे वा  तुझे
ओलावा येतो दाटून मग
तू नसलास जवळी कि
आभाळ कोसळते फाटून मग

सोबतीला तू हवा
असू दे मग थंड हवा
बिलगून तुला घेईन मी
पावसाचा अनुभव नवा

अमित जहागीरदार
पुणे
२० जुलै २०२०

तू मला साथ दे

तू मला साथ दे 

धुंद गाईल गाणे अशीच तू मला साथ दे

चालेन वाट जरी काटेरी तू हातात हात दे ।।

नुसताच जळालो मी अंधार घेऊन सोबतीला 

ये बाहुत अशी पुन्हा मग चांदण्याची रात दे ।।

धूळ होऊन राहिलो दिस पाहिले उन्हाचे 

येई गंध भिजण्याचा श्रावणाची बरसात दे  ।।

निवडुंग जणू मी काट्यांनी फुलणारा 

होऊनी माझी अंगणी एक पारिजात दे ।।

ने मला पैलतीरी यायचे जिथे तू जाते 

बेभान सरितेला शांत दोन काठ दे ।।

ऐकू येईल नाव तुझे माझे जरी घेतले 

स्पंदने हृदयाची नको तिथेही तुझा नाद दे ।।

शद्ब अपूरे पडतात सांगण्या प्रेम माझे 

माझीच राहा आयुष्यभरची खूणगाठ दे ।।

अमित जहागीरदार 

२५ जून २०२०

पुणे