तू मला साथ दे

तू मला साथ दे 

धुंद गाईल गाणे अशीच तू मला साथ दे

चालेन वाट जरी काटेरी तू हातात हात दे ।।

नुसताच जळालो मी अंधार घेऊन सोबतीला 

ये बाहुत अशी पुन्हा मग चांदण्याची रात दे ।।

धूळ होऊन राहिलो दिस पाहिले उन्हाचे 

येई गंध भिजण्याचा श्रावणाची बरसात दे  ।।

निवडुंग जणू मी काट्यांनी फुलणारा 

होऊनी माझी अंगणी एक पारिजात दे ।।

ने मला पैलतीरी यायचे जिथे तू जाते 

बेभान सरितेला शांत दोन काठ दे ।।

ऐकू येईल नाव तुझे माझे जरी घेतले 

स्पंदने हृदयाची नको तिथेही तुझा नाद दे ।।

शद्ब अपूरे पडतात सांगण्या प्रेम माझे 

माझीच राहा आयुष्यभरची खूणगाठ दे ।।

अमित जहागीरदार 

२५ जून २०२०

पुणे