अपूर्ण वर्तुळ
कोण? कुठला ? नाव काय ? कोणते कुळ ?
फिरतोय दिशा दाही पूर्ण करण्यास वर्तुळ ।।
मोजले कुठे कधी डोळ्यातले पाणी
कळली नाही काय व्यथा न कहाणी
हसणे ओठावर तर दुःख खोल अन गूढ ।।
भोगले ते भासे आकाश
आनंदाचा कुठे असे वास ?
हिशेब "तो" करे पण हाती असे आसूड ।।
उमेद जगण्याची शोधून थकलो आता
हात जोडले अन टेकवितो माथा
शांत कर वादळ हे ! शोध खरे मूळ
मातीचा म्हणे जपतो धर्म
मातीचं जाणे सारे कर्म
मातीत मिळण्या का जन्मलो ? काय जडले खूळ
फिरतोय दिशा दाही पूर्ण करण्यास वर्तुळ ।।
अमित जहागीरदार
१९ जानेवारी २०२३
